Təhrif olunmuş Quran şayiəsi…

Küveytdə təhrif olunmuş Quran çap edilməsi barədə yayılan şayiə doğrudurmu?

Qurani-Kərim müsəlmanların müqəddəs kitabıdır. Quranın özündə buyurulduğu kimi, bu kitab qiyamətə kimi təhrifdən uzaq olacaq: “Şübhəsiz ki, Quranı Biz nazil etdik və sözsüz ki, Biz də onu (hər cür artırıb-əskiltmədən) qoruyub saxlayacağıq!” (Hicr, 9). Əsrlər boyunca İslam dininə düşmən olan qüvvələr tərəfindən Quranı təhrif etmək cəhdləri olsa da, bu cəhdlərin üstü tezliklə açılmışdır. Qurani-Kərim müsəlmanların arasında həm yazılı, həm də şifahi şəkildə o qədər geniş yayılmışdır ki, onu müsəlmanlardan xəbərsiz təhrif etmək mümkün deyildir. Xüsusilə, rabitə və kommunikasiyanın inkişaf etdiyi müasir dövrdə bu, qeyri-mümkündür.

Din.az Milli.Az-a istinadən bildirir ki, Quranın təhrif olunmuş nüsxələrinin guya müsəlman ölkələrinin birində (Küveytdə) çap edildiyi barədə, istər sosial şəbəkələrdə, istərsə də whatsapp-da yayılan xəbərlər şayiədən başqa bir şey deyildir. İndiyə kimi həmin Quranın bircə nüsxəsi və bircə səhifəsi də ortaya çıxmamışdır. Ehtimal edirik ki, bu cür şayiələrin yayılmasının səbəbi müsəlmanlar arasında qarışıqlıq yaratmaq və Qurani-Kərimə olan etimadı zəiflətməkdir.